放我幾天假

連日來辛苦的感覺消減了少許，以為真的是夠了三個月，就可以好返...
原來不是，是小牛放了幾天新年假俾我，等我可以舒服一點的過年三十至年初三，可惜這兩天又開始慢慢辛苦了，很討厭呢!

放心少少了!

媽媽今天可以轉到普通病房，相信她的情況一定好了少許，而她自己也說呼吸都順暢了一點，所以我都可以放心一點了!

拜年

今日一班中學同學來我家拜年，他們原本說11:30到來，竟然要1:30才來到，但好彩他們遲了，在他們來之前，奶奶帶同一班親戚上我們的家作示範單位參觀，真搞笑...年中都不知已有多少次的!
今天好朋友的到來，令我們的家熱鬧不少，亦令很難出街的我，開心一下!老公開了Wii給他們玩，但竟然不及一部扭蛋機及夾公仔機吸引，真係會拿出真$$去玩...haha!但到後期又有人因Wii Fit而遲了出發去下一場...唔知他們最後趕唔趕得切下一場呢?!
晚上，就到我們去奶奶家，為老爺慶祝生日，今次我們買了個「招財進寶」蛋糕，個樣係好特別，但口感及味道好似唔係好夾，以楊枝金露布甸加海綿蛋糕...好似唔係好夾，最後仲要俾姑媽話...有芒果唔好食咁多，好掃興，全晚食野食得最開心的部份，竟然被打斷!!(但其實我都知唔可以食芒果的，但實在忍不住了!!)

真係又靚又好味的!

過新年

今年就有好多野唔一樣，今年的25/12(聖誕節)一早睡了，冇慶祝；31/12(大除夕)唔舒服，冇倒數；25/1(年三十)好累，邊到都冇去，花市又行得少，年貨又無咩點買，真係冇咩新年氣氛，最緊要係冇得去短途旅行(當然以上原因唔止因為小寶寶)，希望我可以忍耐到！

嚇死我了！

今天打了一整早上的電話找媽媽，也找不到她，由於她早前已病了，所以很擔心她，老公就和我回家看看，在家中又找不到她，於是問問樓下的看更，她說：「你唔知呀，佢入左醫院，我仲以為你知添」，但我真係唔知，知道後當然非常擔心，想即刻去看媽媽，好彩老公好冷靜的提醒我要收拾一些媽媽的日用品給她。原來媽媽更是因為氣促及其他突然的身體問題而入了深切治療部，她很辛苦，冇咩氣力，仲插滿了喉，真係擔心死。

照oscar

在星期一看余醫生時，他提醒我們在照oscar時要留意，
於是我們在今天照的時間，真的很留心聽醫生所講的數字，但我們當然是不明白的，但頸皮度出來的厚度是令人擔心的，而醫生又沒有任何的指示，只是說等過年後的驗血結果，咁即係點呢?真係好擔心。
而近期學校又有水痘，第一位出的又是我的愛兒，成日同佢攬攬錫錫，當時聽到佢出水痘時，又係好驚，因為媽媽只是說我出了幾粒，咁即係有冇抗體呢?所以我們又要以千多元的價錢，去驗下我有冇抗體，這個更說要send去英國化驗，又係要等到唔知幾時先有結果，真係有太多野令人擔心呢!

預備過新年？

好彩老公今日已經開始放新年假，有佢陪我及「服侍」我，當然唔會因為此而冇咁辛苦，一樣！辛苦都極點!!
今年冇咩精神去街，冇辨年貨，所以好似冇咩新年氣氛咁！
不過，最緊要快d好返，先可以去玩，希望我可以忍耐到好返！我真係好忟呀!!

病假

昨天看了余醫生，我將我的問題全部話晒俾佢聽，佢就俾左一星期的病假我，可惜佢俾漏了星期六，佢一定唔知道我地的高危工作是一星期六天工作週，不過我已申請了年假，由星期六開始，希望老細會批！這幾天的病假都是阿二批俾我的，否則又俾老細鵝幾野先有得放，佢真係想人做死左先好放假！
可惜這兩天的病假生活中，真的是病假，我辛苦到咩都做唔到，郁下都好暈，坐又唔係，訓又唔得，否則夜晚會睡不了，真係辛苦極了，點算好呢！
亮晶晶太太已經好返，點解我仲係咁？

第一次見余醫生

仲以為將軍澳會冇咁多人，最後都係等了兩個鐘。表姐話：「當照超聲波見到佢，就會咩辛苦都唔記得晒」，但點解我都冇咩種感覺，係可以見到佢的頭、身體、手、腳(手就係度上下舉，腳就係度前後踢，好似我發脾氣時咁)，但真係冇咩感覺，在等候時，對對夫婦出來時都會笑咪咪的，但我就不是，可能是因為我實在太辛苦了!

嘔死了

仲以為自己能夠忍得住，盡量唔好嘔，但今日已經第二次嘔死左！真係好辛苦的，究竟幾時先會好返呢？又唔係話嘔完會舒服d，呢頭嘔完，果頭又開始作嘔，點算呀！個個都只係會話開頭係咁，我頂左好耐了，究竟幾時先會好返架？

金魚

終於都完成了開幕，所有的東西都要還原，拆的拆、還的還，
就連小金魚都要沖落廁所，所以我將佢地帶了回家，但帶了回家後，原來沒有地方安置佢地，如果將佢地放落魚缸，佢地就會被「鸚鵡」魚咬的，都唔知點算好......
原來真係要「停一停、諗一諗」先得。

嘔

仲以為自己忍得住，但今晚竟然將晚餐所吃的，全部吐了出來，可能是老公出左去玩，得返自己一個人!!
早兩天的情況好似好了一點點，但估唔到今日...真係死喇!!